CATcert, Kataluniako Ziurtapen Agentziak urtero antolatzen duen sinadura elektronikoko Jardunaldien epai mahaiak ONA Txartela saritu du administrazio publikoen eta gizartearen arteko harremanetarako ekimen elektronikoen modalitatean egokiena izateagatik.

Epai Mahaiaren arabera, sari honekin "Eusko Jaurlaritzak sinadura elektronikoa duen osasun txartelaren eskaintza txalotzen du, horren bidez herritarrei osasun sisteman identifikatzea eta aldi berean euskal administrazio publiko ezberdinek, entitate finantzarioek, eta estatuko administrazioek eskaintzen dituzten zerbitzuaz gozatzeko aukera ematen dielako"

Eusko Jaurlaritzako Administrazioa Eraberritzeko Zuzendariak, Mª Carmen Gómez Corralek jaso du saria. Zuzendariak saria eskertu eta sinadura elektronikoak eta ONA Txartelak egungo garaiaren beharrei erantzuten diela adierazi du.  

"Kanal klasikoen bitartez eskaintzen diren zerbitzuak mantentzearekin batera (bulegoan bertan, telefonoa, posta elektronikoa), Administrazioak behartuta gaude zerbitzu horiek sarean ezartzera gizartearen eta administrazioaren arteko harremana errazteko, eta etorkizuneko on line tramitazioaren zutabeak jartzen has gaitezen" esan du.

Gainera, Araba, Bizkaia eta Gipuzkoako Foru Aldundien, KZgune Sarearen eta tokiko erakundeen laguntzagatik izango ez balitz, ONA Txartelak euskal gizartean izan duen harrera atsegina ezinezkoa izango litzatekeela azpimarratu du.

ONA Txartela, Herritarren zerbitzuetarako Osasun Txartel Elektronikoaren hedapena 2007ko azaroan hasi zen. Gaurdaino, Euskadiko hirurogeita hamar herri eta hirik, EHUk eta  zenbait entitate pribatuk parte hartu dute, eta honela, pixkanaka ONA Txartela euskal gizartean zabaltzen joan da.

Gauzak horrela, OMAko Zuzendariak Erakunde Publikoei ondorengo mezua luzatu die "beraien zerbitzuak sarearen bitartez eskaini ditzatela, erabileraren giltza seguruena dagoeneko herritarren esku aurkitzen baita".

Osakidetzako Osasun Txartela duen 16 urte gorako edonork, eta NAN aurkeztuz gero, ONA Txartelaren eskaera bideratu dezake, eta horretarako, Eusko Jaurlaritzaren egoitza nagusietara, Osasun Zentroetara, edota www.euskadi.net/ona  gunean zehazten diren tokiko gune berezietara jo dezakete.